أنا ولدك .. في رثاء #الحسيني_أبو_ضيف #مصر

أنا ولدك
أنا ولدك اللي ارتويت من نيلك
واللي لما زعلت منك
رحت اشكيلك
ولما زال الوجع مني
رجعت اغنيلك
أنا ولدك

أنا ولدك اللي افتكرتيه باعك
ولما جانا يناير
جهرت بأوجاعك
ورحت في الميدان
لا همني الموت
ولا خفت مالسجان
وقعدت لما أخدتلك تارك
من اللي باعنا زمان
وبرضه كان باعك
أنا ولدك

أنا ولدك اللي ماخافت من العسكر
ووقفت قدامهم لجل عيونك السكر
لما لقيت الطمع طالع من عنيهم
صرخت بعلو صوتي
دي مصر مش معسكر
أنا ولدك

أنا ولدك اللي قام وقف تاني
لما لقى العدل لساه غايب في أوطاني
وزي ما نزلت زمان
برضه نزلت من تاني
مهو لسة نفس الحال
والهم علو جبال
والحر بيعاني
فكرت جانا رئيس هيعدل المايل
لكن لقيته ضعيف
لا حل ولا شايل
ورجعت من تاني أصرخ بعلو الصوت
معدش ينفع بُكى .. ولا عاد يفيدنا سكوت
أنا ولدك

أنا ولدك اللي عاش حياته ضيف
ولما جاه المعاد راح كأنه طيف
يكفيني يا أمي أموت وانا راسي مرفوعة
من يوم ما جانا يناير .. وانا راسي مرفوعة
ولما الخسيس صابني .. برصاصة زي السم
حزنت لما شفتك .. فعيوني لون الدم
وفلحظة فكرتك .. بتشيليني الهم
أتاري الدم دا كان .. شوية من دمي
ودي لحظة فراقك .. ياغالية زي أمي
سايبك ورايح اشوف .. احباب كتير سبقو
حبوكي زي تمام .. وفحبهم صدقو
هقولهم لسة .. بلدنا مأسورة
أصل الطمع الوان
مليون شكل وصورة
أمانه عليكى يا غالية
تستكفي من دمي
كفاية يموتو أخيار
كان همهم همي


عمر الشال
13/12/2012

تعليقات

  1. غير معرف12/13/2012 02:40:00 م

    رائعة

    ردحذف
  2. فعلا ً:
    ياريت تستكفي من دمهم
    بزيادة دلعك باخ
    ياكل حاجة وعكسها
    إزاي وأنا صبري انتها لسه باشوف فيكي أمل
    ليه ........................

    ردحذف

إرسال تعليق

أرجو عدم كتابة أي تعليق مسيء للأديان أو مخالف للآداب العامة وأعد بنشر ما سوى ذلك مهما كان

المشاركات الشائعة من هذه المدونة

10 Amazing Facts You Didn’t Know About Domain Names

وكالة الأنباء الهولندية : القذافي تعرض للإغتصاب بعصاه قبل وفاته #Gaddafi #Libya

حملة إعرف فلولك وعلم عليه : #شفيق لم يقم بطلعة جوية واحدة في حرب 73 !!