صندوق النقد يا صندوقه .. ياسر المناوهلي
صندوق النقد يا صندوقه
سمه في الشهد .. مين هايدوقه
يا باني لي بيتي .. يا صندوقه
يا زارع لي غيطي .. يا صندوقه
من غيرك انت عيشة كحيتي
صندوق النقد يا صندوقه
علمني اصنع وازرع واركع .. لصندوقه
وريني فين مصلحتي برطع .. يا صندوقه
الحقني ف عرضك .. كلبشني بقرضك .. ارتع في بلادنا واعتبرها ارضك
صندوق النقد يا صندوقه
لو عندي نيل .. كان قال مواويل .. عن زرعة ماتت .. عن امة تاهت
مين يزرعهالنا .. غير صندوقه
لو عندي ايد .. كان قمحي يزيد .. وأعيش بكرامة .. مرفوع الهامة
مين يرفعهالنا .. غير صندوقه
يا معلي داري .. يا شريكي في افكاري .. يا مخطط مستقبلنا .. ومصادر قراري
يا شايف مصلحتي .. يا سايبني آكل براحتي .. يا جابر ايدي المكسورة
يا جايب لبن العصفورة .. مين يسقيهولنا .. غير صندوقه
امال الثورة ده قامت ليه .. يا صندوقه
واللي ماتو كانو ماتو ليه .. يا صندوقه
فهمنا معنى الكرامة ايه .. يا صندوقه
ارفع راسك فوق دي تبقى ايه .. يا صندوقه
وكنا بنهتف يسقط يسقط ليه .. يا صندوقه
فهمنا الحره بتاكل بايه .. ايه ايه ايه
يا ماحي ماضينا .. ومجبي علينا
يا حاطط ايدك في جيوبنا .. ومعلم علينا
يا شريك حياتي .. يا مظبط ميزانياتي
واقعين وانت اللي شايلنا .. ومحقق لي امنياتي
مين هايحققها .. غير صندوقه
صندوق النقد يا صندوقه
كلمات وألحان وتوزيع المبدع ياسر المناوهلي
تعليقات
إرسال تعليق
أرجو عدم كتابة أي تعليق مسيء للأديان أو مخالف للآداب العامة وأعد بنشر ما سوى ذلك مهما كان