قصيدة أنا الشهيد .. إهداء للورد اللي فتح جناين مصر #Tahrir #25Jan #Shaheed


اللى زرع وغيره جنى واتحرم وغيره اتغنى ... أنا
واللى ضهره فيها إنحنى واتسرق منه 30 سنة ... أنا
واللى اتفرم وقام وبنى وعمره فيها اتفنى ... أنا

أنا اللى عيارى كان ع الهدف صايب
أنا اللى بروحى وبدمى منعت مصايب
أنا اللى خبطوا على سكنتى وقالوا لى في ضرايب
أنا الشعب اللى كله إخوات واصحاب وقرايب
أنا الحافى اللى متعافى مع إن اللبن رايب
أنا الخير اللى اتركن فوق الشجر طايب

أنا الشهيد سيد بلال وخالد سعيد
ونور على ومصطفى شرعى وكريم بنونة ومحمد فريد
ومريم مكرم ومصطفى الصاوى رافض أنحنى او أبوس الإيد
وأحمد الجزار وسالى زهران وآه على 900 زهرة
أنا اللى سمعت عن التغيير منكم فكام ندوة وميت سهرة
كلمت أحمد ومينا وقولت يلا نمشى فمظاهرة

قابلت جاهل غبى 
قال مأجورة ومندسة وتمويل أجنبى
أنا قلت بلدي مش محتاجة نبي
بدمي أغسل أرضها الطاهرة
ده بليد مذاكرش ان القاهرة قاهرة

أنا اللى كنت تحت الموت بترما
العالم شهد لى بالملحمة
مش مستنى منكم محكمة 
أبويا رفض المكلمة
أخويا فى أرضكم إتعمى 
وأمى ماتت من القهرة

أنا اللى كلبشت النظام فى حديد
أنا اللى كسرت العظام بالإيد
انا اللى عرفتك مين مستفيد 
أنا الاخرص اللى نطق المفيد

مش مستنى عدل قاضى او قاضية
انا النفس اللى صعدت لربها راضية
مسلم ومسيحى صب لى أتوضا
شفنا الشيطان من ورا الحيطان وقع من الخضة
والله عقولنا دهب وقلوبنا من فضة

ارفع راسك أيها المصرى بلدك ونزلت فى الكتاب حصرى
انا لقمتى زادى وتربتى قصرى
أنا درع الزمان وفارس عصرى

أنا كنت اخر أمل فى دعاء الناس الغلابة
أنا اللقمة اللى وقفت فى حلق الديابة
انا الصباع الصباع اللى هزم ملك الغابة
أنا اللي علمت التاريخ القراية والكتابة

محمد فوزى باكوس

القصيدة دي عجبتني جدا مع ان الكاتب مش مشهور وهو له فيديوهات على اليوتوب ساخره على أنه مترشح للرئاسة الجمهورية .. بس فعلا القصيدة رائعة
الفيديو اللي فيه القصيدة

المشاركات الشائعة من هذه المدونة

دليل حقوق المواطن وواجباته عند التعامل مع أجهزة الشرطة - وزارة الداخلية

محدث - حقائق صادمة : ذهب مصر المنهوب ... عن جبل السكري نتحدث #SCAF #Egypt #NoSCAF