هدايا المجلس للثوار يوم 25 يناير القادم #Tahrir #25Jan2012 #SCAF


بما إن 25 يناير طلع عيد الثورة ! وإحنا منعرفش !
وبما إن المجلس هو اللي حمى الثورة !! وإحنا مخدناش بالنا !
وبما إنهم كمان قالوا انهم هيوزعوا علينا هدايا يوم 25 !!! وإحنا ونصيبنا !
فأظن من حقنا اننا نتوقع نوعية الهدايا دي !!!!! وإحنا اللي هناخدها :
  • دبدوب علي شكل خالد عبد الله كل متدوس عليه يقول "يا واد يا مؤمن" ..
  • ودبدوب علي شكل العيسوي تدوس علي بطنه يقول إحنا ما عندناش قناصة ..
  • دبدوب على شكل عكاشة تدوس على بطنه يرجع في وشك ..
  • بنك الحظ الحربي :
بطاقة : حماتك تحبك أرسلت لك حوالة اذهب إلى س ٢٨ لتحصل عليها ..
بطاقة: قمت بثورة والقاضي حبس الثوار إدفع 20 ألف جنيه كفالة وإذهب للسجن فورا ..
  • بسكلتة إنتاج .. ومنفاخ هدية ..
  • السي دي الكامل لتمثيلية محاكمة المخلوع  Un Cut ..
  • كتاب "السلاسل الفضة في أصول الثورة المضادة" ..
  • كتاب "الشهيق والزفير في جمال بدلة المشير" ..
  • مسدس بيضرب طلقات فوتوشوب بيموت الناس الى فوتوشوب ..
  • طرف تالت لكل مواطن ..
  • لعبة سبايدر بتمشي على الحيطة وبتغنى ..

وبكده نستفيد إن المجلس بيدعو كل المواطنين للنزول في الشارع للمشاركة في إحتفالات الثورة في نفس الوقت اللي بيحذر فيه نفس المواطنين من النزول للشارع والمشاركة في المظاهرات علشان منخربش البلد !
وهي دي الحياة يوم 25 يناير في رعاية المجلس

المشاركات الشائعة من هذه المدونة

دليل حقوق المواطن وواجباته عند التعامل مع أجهزة الشرطة - وزارة الداخلية

محدث - حقائق صادمة : ذهب مصر المنهوب ... عن جبل السكري نتحدث #SCAF #Egypt #NoSCAF