مطلوب زعيم !! #Egypt #Tahrir #25Jan

كلمات أغنية مطلوب زعيم لفريق كاريوكي + الفيديو الأصلي للأغنية

مطلوب زعيم
لشعب طول عمره عظيم
لشعب كان فاعل زمان
لكنه هان حتى انه صار
بإدين كبار وإدين صغار
مفعول بيه بيقسموه ويفرقوه
بيقطعوا في عين اللى جابوه
واللى جابوا ابوه
علشان يموت او ينتهى


مطلوب زعيم
لشعب حكموه خانوه
وتوهوه وغيبوه واللى انتبه منه وفاق
غملوا عينه وكمموه
وسلموه فى المعتقل
لكلاب جعانه يقطعوه
لكنه رغم القهر قام زجر وزام
وفى اسبوعين زلل حصور الجلادين
هد النظام فوق راس جميع المفسدين


مطلوب زعيم
يحمى الحقوق 
يعدل ما بين الناس تمام زى الفاروق
ويكون حنين على الفقير
وعلى اللى فاسد يفترى
يهدم على دماغه الشقوق
ويعلقه فى المشنقه
او يرفعوا على راس خازوق


مطلوب زعيم
ميقولش على الخواف حكيم
ويكون كمان سمعه سليم
يسمع لنبضه قلبنا
ويكون مكانه فى وسطنا
ما يعيشي ابدا في القصور
والبعض منا للاسف ساكنين قبور
يشرب و ياكل اكلنا
و يعيش كاواحد مننا
يسمعلنا ويشور وياخد راينا
وقت الخطر نتلم حواليه كلنا
ونضحى وياه بعمرنا


مطلوب زعيم
على المسؤليه يكون امين
ويكون جرئ ويكون شجاع
مش إمعه وحته بتاع
يعرف يقول للظلم لا
ويموت ولا يفرق فى حق


مطلوب زعيم
نقدر نحاسبه بالقانون
أونعزله لو للامانه يوم يخون
لا يشترط الشكل ايه
لا يشترط السن ايه
لا يشترط المله ايه
شرطه الوحيد يكون بشر
بالاختصار مطلوب دكر!


الفيديو الأصلي لأغنية مطلوب زعيم


فيديو لأغنية مطلوب زعيم من ميدان التحرير

المشاركات الشائعة من هذه المدونة

محدث - حقائق صادمة : ذهب مصر المنهوب ... عن جبل السكري نتحدث #SCAF #Egypt #NoSCAF

دليل حقوق المواطن وواجباته عند التعامل مع أجهزة الشرطة - وزارة الداخلية